今日葉家寶率領副總裁趙汝強、助理副總裁譚健深、冼偉智、周寶蓮、藝員朱慧珊、袁潔儀、蔡國威、林睿、亞姐冠軍張軼珺，出席「香港國際影視展2015」。
對於有網民惡搞一個網站「ThisATV」，仲放咗好多亞視節目，例如《ATV這一家》、《我愛下午茶》等等，葉家寶話：「我哋依家都追究緊，冇得到我哋允許攞咗我哋網站嘅材料，所以我哋正查緊佢嘅IP，但我哋暫時未報警備案，等了解咗整個進度，同埋睇下佢有冇進一步惡搞，我哋都知道網民好創意，不過最重要唔好影響到我哋公司正常運作、亞視嘅聲譽。」
近日有報道指無綫以一千七百萬購入亞視部份劇集，問到劇集版權係咪賣晒﹖佢話：「唔會，我哋仲有接近一萬小時嘅劇集，絕對唔係賣晒畀人，我哋賣咗畀人嘅劇集，亞視依然有播映權，所以對我哋播出運作係冇影響，只不過我哋唔可以再銷售呢啲節目，(如果對方拍續集呢﹖)如果佢哋願意去改篇，我哋版權都畀咗新嘅買家，不過我覺得依家香港要不斷推出新節目。」
講到亞視第二大股東蔡衍明入稟高等法院，向大股東黃炳均追討五千萬利息，葉家寶話：「始終係股東層面事情，我諗由番我哋股東去解決，所以我哋唔評論，因為我哋股東過往有好多問題，所以交番畀股東處理。」提到有法律界人士指呢事件有可能影響到亞視賣盤情況﹖葉家寶話：「係，相信喺呢段期間有咁嘅聲音，係會有啲影響，但我哋深信新投資者知道我哋公司過往嘅情況，查生同蔡生合組一間公司，黃炳均先生一間公司，佢哋過往唔係協調得好好，我諗新投資者會理解。」 
Source: http://hk.apple.nextmedia.com/enews/realtime/20150323/53559461