《四個女仔三個BAR》喺播出期間廣受好評，估唔到佢嘅大結局亦都出人意表。大結局最尾嗰幕，Mr. Fan范大狀(黃智賢飾演)坐咗喺終審法院外面睇緊李丹留俾佢嘅日記。跟住Giselle (陳凱琳飾演)打俾佢問佢喺邊，Mr Fan話佢喺CFA(終審法院)等緊佢哋。
轉個頭就係影住Giselle同阿花(何雁詩飾演)佢哋上到嚟會合Mr Fan，仲喺度傾計，但係就聽唔到佢哋講咩。而電視就播畫外音:「今日係一年一度法律年嘅開始，喺開始儀式上，終審法院首席法官馬道立，致辭嘅時候表示，香港過去一年經歷唔少挑戰，佢提醒香港人，今年面對逆境嘅時候，唔好忘記過去造福香港嘅基本因素。」然後就播《We Shall Overcome》。最尾就由Giselle回頭望住終審法院大門作結尾。
以為就咁完？咁你就錯啦。有人就發現喺網上面播出嘅大結局版本，原來係同電視或者MyTV播嘅係唔同架！由Mr Fan接電話開始，佢其實係問Giselle:「你哋冇跟大隊一齊去遊行咩？」而佢哋被滅聲播畫外音嗰段，其實Mr Fan係講:「仲以為你哋會同大隊一齊操上嚟添!」而四女就話因為驚趕唔切，所以先上去終審法院。Giselle仲話:「Quinton (張繼聰飾演)話龍頭已經去到皇后大道中同雪廠街交界。」
之後重點就嚟啦，就係佢哋五個人望向通去終審法院條斜路，個畫外音係講:「法律界今日發起黑衣大遊行，由高等法院遊行到終審法院，抵達之後，眾人低頭靜默三分鐘，今次遊行嘅目的，就係要重新宣示，維護香港司法獨立嘅重要性。」然後就見到黃智賢、張繼聰等人著住黑衫，係終審法院外默哀。好明顯其實就係講緊係去年6月27日，香港1,800名法律界人士發起黑衣靜默遊行，反對《一國兩制白皮書》破壞香港司法制度同司法獨立。佢哋希望以行動表明法律界捍衞司法獨立之決心，仲係終審法院外靜默3分鐘。
其實好似以前《棟篤神探》都係有兩個結局，原因係因為觀眾唔鍾意黃子華最尾好似死咗咁，所以紛紛要求要有第二個結局。但係今次點解《四個女仔》都要有兩個結局呢？莫非TVB覺得觀眾會唔鍾意見到法治人員靜默遊行堅守香港司法獨立？
而無綫企業傳訊部宣傳科副總監曾醒明就表示已向監製了解，香港結局篇只得一個版本，而網上面其他畫面就有待了解。吓？個劇拍咗幾多個結局都唔知？