喺電影《長江七號》扮男仔，而家就女大十八變嘅徐嬌，有睇微博就知佢鍾意玩cosplay。啱啱喺年初一嘅時候，佢就post咗一幅著住傳統服飾去香積寺上香嘅相。
點知被部份網民話「奇裝異服」、「cosplay」甚至「著和服」等等。你唔好睇佢弱質纖纖，其實佢都唔係好恰。佢俾人鬧咗5個鐘頭後即刻就喺微博回應同網民駁火：「我穿的是漢服，是漢民族的傳統服飾，不是奇裝異服，更不是cosplay。漢族的傳統服飾不是旗袍，不是唐裝，而是漢服！」。最後仲加多句《詩經‧秦風‧無衣》嘅「豈曰無衣，與子同袍！」意思係話佢為咗無人認識漢族嘅傳統而感到憤慨。
咁又唔怪得啲網友嘅，徐嬌之前著住套漢服同方文山行紅地氈，都俾內地新聞網站編輯話佢著和服啦！當時都搞到佢俾啲愛國憤青鬧到佢上天花板。
唔知徐嬌係咪汲取咗上次嘅教訓，今次要即刻反擊，唔再俾人無端端係咁鬧呢？
圖片：微博